ગઈકાલે સવારે પ્રાતઃકાળે અમદાવાદની બહાર જવાનું થયું, હજી સૂર્યોદય થયો નોહતો અને નજર એકદમ આકાશે પડી..
મંગળની જોડે એકદમ જ નજીક એક ચમકતો પ્લેનેટ હતો,પેહલા તો એ શુક્ર હોવાનો આભાસ થયો પણ તરત જ મગજ ટટોળ્યુ, મંગળ અત્યારે તો તુલા રાશીમાં છે, અને અત્યારે ધનારક તો બેસી ગયા, સૂર્ય હવે ધન રાશીમાં આવી ગયો છે,અને જનરલી શુક્ર અને બુધ આ બે ગ્રહો સૂર્યની આજુબાજુની રાશીમાં જ હોય, તો પછી અત્યારે આ કયો ગ્રહ ભૂમિસુત જોડે આટલો નજીક યુતિમાં આવ્યો..?? અને પાછુ નરી આંખે પણ એમની યુતિ દેખાઈ રહી છે..!!??
મગજમાં કીડો ભરાયો, એટલે ડ્રાઈવરને કીધું સાઈડ પર કર દોસ્ત ગાડી, હજી શ્યામલ ચાર રસ્તાથી ચીમન પટેલના બંગલાવાળા મેદાન સુધી જ પોહચ્યો હતો, ખુલ્લુ મેદાન હતું એટલે બે ગ્રહોની યુતિ નરી આંખે સ્પષ્ટ દેખાતી હતી ..
આપ`ડે તો ગાડીમાંથી ઉતરીને મસ્ત ઠંડીમાં મોબાઈલમાં ગુગલ સ્કાય ખોલ્યું અને એમાં “જ્ઞાન” મળ્યું કે મંગળ જોડે તો સાક્ષાત દેવગુરુ બૃહસ્પતિ યુતિમાં આવી ગયા હતા,એવું ગુગલ સ્કાય બતાડી રહ્યું હતું..!!
ફરીવાર કન્ફર્મ કરવા માટે કુંડળીની એપ ખોલી, અને એમપણ તુલા રાશિમાં મંગળ-ગુરુ યુતિમાં દેખાયા,સૂર્યદેવ જોડે આજકાલ શનિ,શુક્ર અને બુધ ધનરાશીમાં છે..!!
અદ્દભુત ગુરુ-મંગળ યુતિ દર્શન થયા..!!
કોઈને સેહજ પણ રસ હોય તો વેહલી સવારે પૂર્વ દિશમાં અને સાંજે સુર્યાસ્ત પછી પશ્ચિમે ગુરુ-મંગળની યુતિ સ્પષ્ટ અને એકદમ નરી આંખે દેખાઈ રહી છે..!! બહુ જ સરસ નજારો છે..
ક્યારેક વોટ્સ એપ,ફેસબુક અને ઈન્સ્ટા ની બહારની દુનિયા જોઈ લે દોસ્ત..!!
જો કે આ સલાહ તો પરોપદેશેપાંડિત્યમ જ છે, હું જ આખો દિવસને રાત રચ્યો પચ્યો રહું છું આ સોશિઅલ મીડયામાં..!!
ગઈકાલે બીજી પણ એક ઘટના ઘટી, મને એક વોટ્સ એપ ગ્રુપમાં ટોકવામાં આવ્યો કે અડધી રાત્રે મેસેજ ના કરો..
પેહલા તો મને થયું કે હશે “કાકા”ની ઉંમર થઇ હશે એટલે ટોકવાની ટેવ પડી હોય એટલે ટોકે,પણ પછી “કાકા” આંગળ વધ્યા આખી વોટ્સએપ સંહિતા બનાવવાના મૂડમાં આવી ગયા..!!
હવે મારી વાત કરું તો શરુ શરુમાં મને પણ અડધી રાત્રે વોટ્સ એપ મેસેજ આવતા ત્યારે દાઝ ચડતી, પણ પછી સેહજ શાંત દિમાગે વિચાર્યું કે હું સાંજે પણ વોટ્સ એપ મેસેજ ઠોકું છું ત્યારે પેલો સિડની અને મેલબોર્નવાળો બાપ`ડો ઘસઘસાટ ઊંઘતો હોય છે,એ બાપ`ડાની ત્યાં અડધી રાત જતી હોય છે અને દિવસે મેસેજ કરું તો યુરોપ અમેરિકાવાળા હેરાન થાય છે….!!
અને આ જ વસ્તુ સામે મારી સાથે પણ થાય છે, હું જેમ એમને મેસેજ કરું છું એમ એ લોકો પણ મને મેસેજ કરે છે..!!
એટલે પછી હવે મેસેજ કરવામાં વળી “વેળા-કવેળા” ક્યાં શોધવી ?
ન્યુઝીલેન્ડ,ઓસ્ટ્રેલિયા થી લઇને અલાસ્કા સુધીના લોકોના ટાઈમ હું સાચવવા જાઉં તો ક્યાં મેળ બેસે..??
ફાઈનલી આપ`ડે એક કામ કર્યું કે વોટ્સ એપના અને બીજા બધા સોશિઅલ મીડિયાના નોટીફીકેશન સાઉન્ડ ઓફ કરી નાખ્યા..!!!
પત્યુ..!!
એટલે મારી દરેકને વિનતી કે મારા “કવેળા” ના મેસેજથી તકલીફ થતી હોય તો તમારા નોટીફીકેશન સાઉન્ડને ઓફ કરી અને નિરાંતની ઊંઘ માણો..!!
બાકી હમ નહિ સુધરેંગે..!!
બીજા પણ ઘણા “કાકા”ઓ મને સોશિઅલ મીડિયામાં ટોકા-ટોકી કરી રહ્યા છે, મુદ્દા જુદા જુદા હોય ટોકવાના, પણ ટોકે..એક “કાકા”ને આજે જ “ક-મને” અનફ્રેન્ડ કર્યા..!
(અહિયાં “કાકા” શબ્દ માનસિક ઘડપણ દર્શાવા વાપરું છું)
કદાચ વોટ્સએપ અને બીજા સોશિઅલ મીડિયા હવે સમયના અને સરહદના બંધન પાર કર ચુક્યા છે, આજે વોટ્સ એપથી લઈને બીજા તમામ સોશીયલ મીડિયા કોઈપણ દેશમાં ૨૪*૭ થઇ ચુક્યા છે એમના બ્રોડકાસ્ટમાં કદાચ પેલુ કહે છે ને ધ સીટી નેવર સ્લીપ એમ દુનિયાભરમાં ફેલાયેલા આ બધા સોશિઅલ મીડિયા ક્યારેય ઊંઘતા જ નથી..!
સોશિઅલ મીડિયાના આ “નાં” ઊંઘવાના પ્લસ અને માઈનસ બંને છે,
પ્લસમાં માણસ અડધી રાત્રે પણ કનેક્ટેડ રહે છે,અને માઈનસમાં માણસ અડધી રાત્રે ઊંઘવાને બદલે અડધો જાગતો પાડ્યો રહે છે..!
હવે દરેક ઈન્ડીવિજ્યુઅલ એ પોતે નક્કી કરવાનું છે કે પોતે શું કરવું છે..!!
એને કેટલો સમય એને કનેક્ટ થવું છે, અને કેટલો સમય ડીસકનેક્ટ થવું છે,
અને હા “કાકા” પોતાના વિચારો બીજા કોઈ ઉપર થોપવાનો મતલબ નથી..!!! કે તું આટલા સમયમાં જ મેસેજ કરી શકે અને આટલા સમયમાં નહિ..!!
ઘણા વોટ્સ એપ ગ્રુપમાં કોઈ ચોક્કસ ટોપિક ઉપર ચર્ચા કરવી, કે બીજી કોઈ સામાજિક ,ધંધાકીય સમસ્યા ઉપર ચર્ચા કે સરકારી નીતિઓ ઉપર વગેરે વગેરે ઉપર રહીને ચાલવું એવું બધું શરુ શરુમાં નક્કી કરવામાં આવે છે,પણ સરવાળે તો એકાદ બે ફોરવર્ડીયા દરેક ગ્રુપમાં હોય કે જે આંખ બંધ કરીને દસ પંદર વીસ મેસેજ કોઈપણ સમયે ફોરવર્ડ કરી જ નાખતા હોય છે,એમના માટે બસ ફોરવર્ડ કરવું એટલું જ અગત્યનું હોય છે એટલે મેસેજ ફોરવર્ડ થાય એટલે ગ્રુપમાં એમનું અસ્તિત્વ સાબિત થઇ થઇ જાય એટલે પત્યું..!!
આવા બીજા ઘણા બધા ફોરવર્ડીયા ના “પ્રકાર” હોય છે દરેક ગ્રુપમાં,
બીજુ દરેક વોટ્સ એપ ગ્રુપમાં “કાકા” સિવાયના એક-બે “મોટો ભા” પણ હોય છે, જેને બધાને ટોકવામાં મજા આવતી હોય છે અને એમને પણ મારા જેવાને ટોકવાની વધારે મજા આવે..!!
કારણ શું ? ખબર છે ..?
પેલી નવી પરણેલી વહુ સાસરે ઘણી મેહનતે એકદમ મસ્ત દાળ બનાવતી હોય, પણ સાસુ રસોડે આવે દાળ સુંઘે પછી અડધી ચપટી મીઠું દાળમાં નાખે અને પછી સાસુ બોલે જો હવે સરસ થઇ દાળ..!!
બિલકુલ આ “સાસુ” ની જેમ મને વોટ્સ એપ ગ્રુપમાં એ ટોકે એટલે એને દાળ સુધાર્યા નો સંતોષ થાય..!!
અલ્યા “ડો`હા” આ ૮૦૦ શબ્દો હું લખુ છું, ટાઈપ કરું છું અને તું એક બે લીટી લખીને મને ટોકે છે અલ્યા..!!
તો લખો ને “સાસુ” તમે પણ..!!
મને તમને વાંચવા નહી ગમે તો સ્ક્રોલ કરી નાખીશ..!!
મેં ક્યા તમારા રૂપિયા બગડ્યા કે લઇ ગયો કે તમારી દાળ બગડી નાખી મેં કે તમારો દા`ડો બગડ્યો હે ..? તે ખોટી કટકટારી કરો છો..!???
એની વે ભડાસ “પ`તી…”
જે “કાકા” કે “ડોહા” ને મન પર લેવું હોય તો છૂટ,ઈશ્વર સુધરવાનો સહુ ને મોકો આપે છે તમને મેં આપ્યો અને સુધરવું હોય તો તમારો કુવો તમને મુબારક..!
મારે તો આખું બ્રહ્માંડ મારું છે, અને હું તો હેન્ડ્યો ધા`બે મંગળ-ગુરુ ને શોધવા અને છોકરાવને બતાડવા..!!
અને તમે ..??
જા`વ ધાબે..!!
ડોહા નથી થવું આપડે આટલા જલ્દી..!!!
શુભ રાત્રી
શૈશવ વોરા
