સોશિયલ/ ડિસેમ્બર 31, 2022/

Hira ba ni vidaai ??

હીરાબાની વિદાય..

કુદરતની નિરંતર ચાલી આવતી પ્રક્રિયાનો એક ભાગ એટલે મૃત્યુ, બહુ બધા લોકોએ અંજલી શ્રદ્ધાંજલિ આપી, નરેન્દ્રભાઈની પ્રશંસા પણ ખુબ થઇ, એમની કર્મઠતાનો દુનિયાને સાક્ષાત્કાર થયો અને એક સજ્જડ દાખલો બેસાડ્યો સમાજ ઉપર પણ..

સમજવું હોય તેને..

ગામનું કુતરું મરી જાય તેમાં પણ રજા પાડી અને ઘેર બેસી રેહવું કે પછી ગલ્લે જઈને દિવસ પૂરો કરવો એ માનસિકતાવાળી પ્રજાને ગમે તેટલા દાખલા આપો કે દલીલ કરો પણ ધાર્યું તો વસ્તી એના મનનું જ કરે છે ..

આજે પણ ..!!

ભારત જેવડા મોટા દેશના વડાપ્રધાન અને એમાં પણ જેની ધાક દુનિયાભરમાં વાગતી હોય એવા દિકરાને જન્મ આપનારી માતા જીવનભર બિલકુલ લો પ્રોફાઈલ રહ્યા,

પચાસ વટાવી ચુકેલા આજકાલના માતાપિતાઓને જુવો અને વાત કરતા સાંભળો તો એમના સંતાન સિવાય બીજા કોઈ ટોપિક ઉપર વાત નથી કરી શકતા ..

જૈનમએ અમેરિકામાં આજે બે વાર પોટ્ટી કરી અને જયતિએ કેનેડામાં આજે બોલો ત્રણ ત્રણ બર્ગર ખાધા ..! દિવસમાં ત્રણવાર ફોન કરી કરી અને લોહી પીવે,

અલી બોન પચ્ચીસ વર્ષનો થયો તારો જૈનમ અને તારી જયતિ હવે તો છુટા મુક.. પણ ના..મને તો હજી પણ ચાલે એના પપ્પાને જરાય ના ચાલે ..!!

હેલીકોપ્ટર પેરેન્ટસ માટે નો એક અદ્દભુત દાખલો છે નરેન્દ્રભાઈ અને હીરાબા ..!!

સંતાન ઉપરનું માતા તરીકેનું પોતાનું પઝેશન લગભગ ઝીરો, અને સામે પક્ષે જેમ ભગવાન આદિ શંકરાચાર્ય સાધુત્વ ધારણ કરી સંસાર છોડી દીધો હોવા છતાં પણ પોતાના માતાના અંતિમસંસ્કાર કરી ગયા હતા તેમ નરેન્દ્રભાઈએ પણ માતા તરફના પોતાના કર્તવ્યનું પાલન કર્યું અને બિલકુલ સરદાર પટેલની જેમ કર્મઠતા બતાવી ..

કામ પતાવી ને કામે ચડી ગયા..!!!

બહુ ઝીણવટથી જોવા જેવો એક કેસ સ્ટડી છે નરેન્દ્રભાઈ અને હીરાબાના માતા પુત્ર તરીકે નો સબંધ ..!

મારી મમ્મી હંમેશા કહે છે કે “માંબાપ જનમ દઈ જાણે ,હેસિયત હોય તે પ્રમાણે ઉછેર કરે અને સંસ્કાર આપી જાણે ..!”

હું એમાં બીજું ઉમેરું કે એનાથી વધુ આપવું પણ ના જોઈએ અને આપવાની કે લેવાની વૃત્તિ પણ ના રાખવી જોઈએ ..! અને માટે જ હું વારસાઈ વેરાની ફેવર કરું છે, વાસી વધે નહિ અને કુત્તા ખાય નહિ,

પેઢીઓ સુધી ચાલે એવા રૂપિયા મૂકી અને હીરાબા અને દામોદરદાદા ગયા હોત તો સંસારની આગમાં તપી તપી અને કંચન થયેલા નરેન્દ્રભાઈ તમને અને મને કદાચ ના મળી શક્યા હોત, નરેન્દ્રભાઈમાં એવું બોલવાની હિંમત ,જીગર કે તાકાત પણ નાં આવતે કે “મારો વંશ હું છું અને મારો વારસ હું છું ..!!”

ક્યાંક મોટી કંપનીમાં સીઈઓ બનીને એમના સંતાનો માટે ભેગું કરવાની લાહ્યમાં લપેટાઈ ગયા હોત ..!!

એક ઉંમર પછી સંતાનની સાથેનો તમારો `એમ્બીયકલ કોર્ડ` ચોક્કસ કપાઈ જવો જોઈએ નહિ તો એ ઝેર થાય .. `એમ્બીયકલ કોર્ડ` એટલે બાળકના જન્મ વખતે જોડાયેલું `નાયડુ` જેને કાપતાની સાથે માતા સાથેનું શારીરિક જોડાણ બાળકનું જોડાણ સમાપ્ત થાય છે અને બાળક પોતાની રીતે શ્વાસ લેવાનું શરુ કરે છે ,જીવનની શરૂઆત કરે છે ..પોતાના જીવનની ..!!

`એમ્બીયકલ કોર્ડ` કપાય તો જ માતાપિતાની વાત અને વાતની પાછળના રહેલા વિચારને બાળક ઓળખતા શીખે , નહિ તો સંતાન દાધારંગાની જેમ ભટક્યા કરે જીવનભર ..!

વૈચારિક રીતે જોડાવાની શરૂઆત થાય બાળકની માતા સાથે અને પિતા સાથે..

માનસિક અને વૈચારિક રીતે મજબૂતી પામેલા માતાપિતાના સંતાનો જ પ્રગતિ કરી શકે છે જગતમાં ,બાકી તો જૈનમ કે જયતિને તમે અમેરિકા નહિ મંગળની યુનિવર્સીટીમાં પણ ભણવા મોકલો તો પણ કોઈ ફર્ક નહિ આવે..

ગધેડાની જેમ એની સવાર, સાંજ અને રાત પડી જશે ..!!

વ્યક્તિ બનશે પણ વ્યક્તિત્વ નહિ ખીલવી શકે ..!!!

આજકાલના પેરેન્ટીંગમાં અને સામે પક્ષે બાળકોમાં એક બીજી પણ વૃત્તિ જોવા મળી રહી છે .. માંબાપને સંતાનો પોતાનું ઈમરજન્સી ફંડ હોય તેમ વાપરે છે અને માંબાપ સંતાનને પોતાનું રીટાયર્ડમેન્ટ ફંડ ગણે છે ..!

બહુ ગંદી પરિસ્થિતિનું નિર્માણ થાય આવે સમયે.. દુનિયામાં અસ્તિત્વમાં છે તે બધી અને જેનું અસ્તિત્વ ફક્ત પુસ્તકોમાં લખાયેલું છે એવી એવી સમસ્યાઓ પણ આ બધા ઘરોમાં જન્મે ,ઉછરે અને વિષવૃક્ષ બનીને ફાલે ..!

ટીવી સીરીયલના લેખકોને સ્ટોરીઓ મળી જાય ..!!

પોતાનો દિકરો ભારત દેશનો વડોપ્રધાન છે છતાં પણ “કામ કરો બુદ્ધિથી અને જીવન જીવો શુદ્ધિથી” આટલી ટકોર કહો તો ટકોર અને વિચાર કહો તો વિચાર સંતાનને આપવાનું ચુક્યા નહિ હીરાબા..!!

બહુ મોટી વાત છે જો સમજાવી હોય તો.. દિવસભર કટકટારી કરી અને જીવતા માતાપિતા અને સામે પક્ષે કુતરાની જેમ માતાપિતાને વચડકા ભરતા સંતાનોને સમજવા જેવું છે , એક કે બે શબ્દ,વાક્યમાં સંતાનને વાત કેહવી અને વિચાર આપી દેવો ..

વાતની પાછળના વિચારને સમજવા માટે એનું-તમારું સંતાન મનન કરે મંથન કરે , એમાંથી કોઈક તર્ક પોતાના મનમાં પેદા કરે અને પછી એ તર્કને ક્યાંક પ્રેક્ટીકલી જીવનમાં અમલમાં મૂકી અને પ્રયોગ કરે ,અને છેલ્લે તેને સિધ્ધાંત બનાવે ..!!

આખી લાંબી અને જટિલ પ્રક્રિયા છે સંતાન માટે કોઈક સિધ્ધાંત બનાવવો તે પણ એના મૂળમાં જઈને જોઈએ તો માતાપિતા દ્વારા કેહવાયેલી વાત છે ..

ફક્ત એક કે બે શબ્દ કે વાક્ય છે..!!

મને તો હીરાબા અને નરેન્દ્રભાઈનો સબંધ અદ્દભુત અને અલૌકિક લાગ્યો છે કાયમ ..

આવા સબંધોમાં માતાપિતા બંનેમાંથી કોઇપણ એક દૈહિક સ્વરૂપે જગતમાંથી વિદાય લ્યે પછી પણ જ્યાં સુધી સંતાન જગતમાં છે ત્યાં સુધી સબંધોનું અસ્તિત્વ વિદાય નથી થતું..!

ચોક્કસ ખાતરી છે અને જાત અનુભવ પણ છે કે સમય સમય પર જેમ પપ્પા આવીને મારી સાથે વાત કરી જાય છે ,વિચાર આપતા જાય છે તેમ નરેન્દ્રભાઈને પણ હીરાબા આવી અને મળી જશે, વાત કરી જશે ,અને વિચાર આપી જશે ..!!

મોક્ષને હજી પણ હું આભાસી વસ્તુ ગણું છું, મૃત્યુ પછીની દુનિયાના અસ્તિત્વનો સ્વીકાર મારું જાગૃત મન નથી કરી શક્યું ,પણ ઈશ્વર નામના ભાવવિશ્વમાં જીવવું ગમે છે, નક્કી નથી કરી શકતો કે મેં ઈશ્વરને બનાવ્યા છે કે હું ઈશ્વરને બનાવી રહ્યો છું ..!

છતાં પણ ભાવવિશ્વ જીવવું ગમે છે અને એ જ ભાવવિશ્વનો એક ભાગ એટલે ઈશ્વર, સ્વર્ગ , નર્ક અને મોક્ષ ..!!

મોક્ષ પ્રાપ્ત થાવ..!

આવશે..,બા જરૂરથી આવશે નરેન્દ્રભાઈ,

જયારે જયારે ઈચ્છા કરશો હ્રદયપૂર્વક..

ત્યારે તમને મળવા ..!!

જય સોમનાથ

શૈશવ વોરા

*(ચેતવણી :- આ બ્લોગને તમે ફોરવર્ડ ચોક્કસ કરી શકો છો, પરંતુ પોતાના નામે કે પછી મૂળ લેખકના નામ વગર કે તેમાં કોઈપણ જાત ના ચેડા કરીને મુકવો તે સંપૂર્ણપણે ગેરકાયદેસર છે, જે કોઈ વ્યક્તિ તેવું કરશે તો કોપીરાઈટ એકટ નો ભંગ ગણાશે અને તે પ્રમાણે કરનાર સામે કાયદેસર કાર્યવાહી ચોક્કસ કરવામાં આવશે..)*